هەڤاڵ پۆڵا تاڵەبانی: ساڵی داهاتوو وەرچەرخان و گەشەپێدانی یەکێتی دەبێت

"ساڵی نوێ، ساڵی گەشەپێدانی زیاتری یەکێتی دەبێت"

"یەکێتی هەمیشە بەشێک بووە لە چارەسەری کێشەکان"

"یەکێتی داکۆکی لە سەرجەم پشکەکانی دەکات بە تایبەت لەدیاریکردنی باڵیۆزەکان و نوێنەرایەتیەکانی حکومەت"

ئێوارەی پێنچ شەمە ٢٩ کانونی یەکەمی ۲٠۲۲، هەڤاڵ پۆڵا سیروان تاڵەبانی ئەندامی مەکتەبی سیاسیی و لێپرسراوی مەکتەبی ناوەندەکانی دەرەوە لەگەڵ لێپرسراوی ناوەندەکانی وڵاتانی دەرەوە، بەساتێک بێ دەنگی لەگیانی پاکی شەهیدان کۆبۆوە.

هەڤاڵ پۆڵا، دواین گۆڕانکاریەکانی دۆخی سیاسی عیراق و پەیوەندیەکانی یەکێتی و حزبە سیاسییەکانی هەرێم و بەغدای بۆ ئامادەبووان روونکردەوە، لەم ڕووەوە رۆڵ و کاریگەریی یەکێتیی نیشتیمانیی کوردستانی وەك هێزێکی کاریگەری ناوچەکە لەبەرامبەر کۆی ئەو پرسانە بۆ ئامادەبووان باسکرد.

هەڤاڵ پۆڵا تاڵەبانی وتی: یەکێتی هەمیشە بەشێک بووە لە چارەسەری کێشەکان و ئێستاش بە سەرۆکایەتی سەرۆک باڤڵ باشترین پەیوەندی لەگەڵ کابینەکەی محەمەد شیاع سودانی، سەرۆک وەزیری عیراق هەیەو یەکێتی پشتیوانی لەهەوڵەکانی حکومەت بۆ جێبەجێکردنی کارنامەکەی لەچوارچێوەی پابەندبوون بە دەستوور دەکات، راشیگەیاند

یەکێتی لەنێو ئەو کابینەیەدا داکۆکی لە سەرجەم پشکەکانی دەکات بە تایبەت لەدیاریکردنی باڵیۆزەکان و نوێنەرایەتیەکانی حکومەت.

هەروەها گەشبینی خۆشی بەبووژانەوە و گەشانەوەی ی.ن.ك لەم قۆناغە چارەنووسساز و هەستیارەدا دەربڕی، بە جۆرێك، کە خزمەتکردنی کۆمەڵانی خەڵکی کوردستان و پرسی ڕەوای کورد لەدەرەوە لەپێشەنگی کارە بەردەوامەکانی بێت و هیواشی خواست ساڵی داهاتوو، ساڵی وەرچەرخان بێت بەئاراستەی گەشەکردن وبەهێزکردنی ی.ن.ک.

سەبارەت بە پرسی ھەڵبژاردن، هەڤاڵ پۆڵا ئاشکرایکرد؛ زۆربەی ھێزو لایەنە سیاسییەکانی ھەرێم لەگەڵ چاکسازیی شێوازی هەڵبژاردن و داڕشتنەوەی یاسایەکی نوێ و هەڵبژاردنی فرە بازنەیی دای و تەواوی حزبەکانی تر لەگەڵ (ی.ن.ك) کۆکن، کە دەبێت یاسای هەڵبژاردن چاکسازیی تێدابکرێت.

پێداویستیی ئۆرگانەکان لە دەرەوەی وڵات تەوەرێکی تری کۆبوونەوەکە بوو، ئاماژەی بەوەکرد، رێگەچارەکان بە ستراتیژ و شێوازێکی نوێ، کە لەگەڵ تەکنەلۆژیا و پێشکەوتنی ئەم سەردەمەدا بگونجێت، ساڵی نوێ دەکەینە ساڵی گەشەپێدانی زیاتری یەکێتی لە ناوخۆ و دەرەوەی وڵات.

بەخستنەڕووی دیدو تێڕوانینی هەڤاڵانی بەشداربوو وەڵامدانەوەیان لەلایەن هەڤاڵ لێپرسراوی مەکتەبەکانی ناوەندەکانی دەرەوە کۆتایی بەکۆبوونەوەکە هات.

راگەیاندنی

مەکتەبی ناوەندەکانی دەرەوە

٢٩ کانوون یەکەم ٢٠٢٢