پۆڵا سیروان تاڵەبانی: یەکێتی، بەردەوام لە نوێبوونەوەدایە

پۆڵا سیروان تاڵەبانی: یەکێتی، بەردەوام لە نوێبوونەوەدایە

سوید

لە درێژەی سەردان و کارو چالاکییەکانی هەڤاڵ پۆڵا سیروان تاڵەبانی ئەندامی مەکتەبی سیاسی و لێپرسراوی مەکتەبی ناوەندەکانی دەرەوە، بە هاوڕێیەتی ئەندامانی مەکتەب هەڤاڵان ساڵح قەیتولی و هەندرێن باوەنوری، سەرپەرشتی کۆبوونەوەی ئەنجومەنی ناوەندی سویدی یەکێتیی نیشتمانیی کوردستان-ی کرد لە شاری ئۆرەبرۆ لە سوید، بە مەبەستی رێکخستنەوەی دەستەیەکی نوێ بۆ ناوەندی سوید

لە سەرەتای کۆبوونەوەکەدا، خاتوو باخان بورهان لێپرسراوی ناوەند بەخێرهاتنی لێپرسراوی مەکتەبی کرد،  پاش دەقیقەیەک وەستان بۆ گیانی پاکی شەهیدان، کۆبوونەوەکەی سپارد بە لێپرسراوی مەکتەب
پاشان هەڤاڵ پۆڵا سیروان تاڵەبانی، لە وتەیەکدا دەستخۆشی لە دەستەی ناوەند و  لێپرسراوی کەرتەکان کرد کە لە رێگای دوورەوە هاتبوون، دواتر تیشکی خستەسەر ئامانجی کۆبونەوەکەو پلان و بەرنامەکانی مەکتەبی روونکردەوە  کە خۆی دەبینێتەوە لە نوێکردنەوەی دەستەی ناوەند و پێکهێنانی دەستەیەکی نوێ لە گەڵ ئۆرگانەکان کە لەژێر چەتری ناوەندی سوید بە یەک تیم ئەرکەکانیان جێبەجێ دەکەن، وتیشی: هەروەک سەرۆک مام جەلال تەئکیدی لەسەرکردۆتەوە، هەمیشە خۆنوێکردنەوە ئامانجێکی یەکێتی بووە و هۆکارێکی گەشەکردنی بووە، وتیشی: لەسەر بڕیار و راسپاردەی سەرۆک بافڵ جەلال تاڵەبانی، نوێبوونەوەی یەکێتی بەردەوامە و ئەمەش هۆکارێکە بۆ بەهێزبوونی زیاتری یەکێتی، راشیگەیاند: بەهێزبوونی یەکێتی، لە قازانجی کۆمەڵانی خەڵک و هەموو چین و توێژەکان و پاراستن و گەشەپێدانی دەستکەوتەکاندایە، ئاماژەی بەوەشدا: هەموو هەوڵەکانی یەکێتی لەپێناوی خزمەتکردنی زیاتری کۆمەڵانی خەڵکدایە
هەر لە کۆبوونەوەکەدا، پاش روونکردنەوە و دانانی بەرنامەیەکی پوخت، بڕیاردرا بە دانانی دەستەیەکی نوێ بۆ بەشەکانی ناوەند کە سەرجەمیان لە کادرە تێکۆشەر و بە ئەزموونەکان و کەسوکاری شەهیدان پێکهاتبوون
لە بەشێکی کۆبوونەوەکەدا، هەڤاڵ سەمیر ئەمین نوێنەری یەکێتی لە سوید، تەەاوت پشتیوانی خۆی بۆ سەرخستنی کارەکانئ ناوەندی سوید دەربڕی

لە کۆتایی کۆبوونەوەکەدا، لێپرسراوی نوێی بەشەکان، سوپاس و خۆشحاڵی خۆیان دەربڕی بەو متمانەیە و  بەڵێنیاندا وەک یەک تیم بە سەرپەرشتی لێپرسراوی ناوەند، کاربکەن بۆ سەرخستنی یەکێتیی نیشتمانیی کوردستان

پاش تەواوبوونی گفت و گۆی هەڤاڵان کۆبونەوەکە بە سەرکەوتووی کۆتایی پێ هات